Willemstad, 12 October 2011

Royal Haskoning ta duna kontenido na plannan di GreenTown pa tereno di Isla

E siman ku a pasa drs. Paul Jansen i Prof. Dr. Jacques van Dinteren di Royal Haskoning a bishitá Kòrsou pa na un manera ophetivo indiká e puntonan fuerte i esnan ménos fuerte di plan alternativo di GreenTown Curaçao. Nan ke logra transformá e área kaminda Refineria Isla ta operá ainda den un área ku hopi mas bentaha pa henter komunidat i kompletamente limpi i mihó pa medioambiente.
Royal Haskoning ta un ofisina di konseho, ingeniero i arkitekto ku ta operá mundialmente for di 17 pais. Nan ta empleá 3900 kolaborador ku ta traha na 57 ofisina. Nan ta bon konsiente di nan responsabilidatnan en frente tur stakeholder, komunidat i medio ambiente. Nan ta asistí GreenTown Kòrsou pa na un manera efikas, efisiente i duradero saka lo máksimo na benefisio sosial i finansiero for di e tereno i pa transformá e kurason humadó di Kòrsou pa e kurason bèrdè di Karibe. Nan a papia spesialmente ku kompanianan alo largu di Schottegat i institutonan ku aworó lo mester duna kontenido na 460 hèktar di propiedat inmóbil Nan a aserká outoridatnan gubernamental tambe pa tende nan vishon i nan pensamentu di e plan.
Diversifikashon
Manera ta konosí GreenTown Curaçao en koperashon ku su partnernan Studio Acht - Caribbean Architects N.V. i Lighthouse Club Curaçao ta traha na un plan alternativo pa remplasá e refineria. Segun e plan aki, na e sitio kaminda e refineria ta situá meimei den haf di nos kapital por logra un desaroyo ekonómiko duradero muchu mas fuerte. Ta bini aserka ku e loke aktualmente e propiedat inmóbil aya ta produsí na kaha di gobièrnu no ta sufisiente i ku ta un kantidat relativamente chikitu di hende ta traha den e parti mas grandi di nos área di haf. GreenTown Kòrsou ta antisipá ku e tereno aki por produsí sigur 10 biaha mas tantu entrada ku awor ta pagando na hür. E espektativa ta ku riba e tereno, kaminda awor tin alrededor di 900 hende ta traha, 9000 hende por traha. Asina ku a sanea e tera i e awa, e área aki por ubiká 5000 kas riba e tereno i alo largu di e awa. Esaki ta un oportunidat úniko tambe pa diversifikashon di ekonomia total di Kòrsou. E idea ta pa komuniká Otrobanda i Punda ku e tereno di Isla i asina integrá esaki den e partinan mas bieu di nos kapital pa e bira un parti di siudat ku ta nobo, bèrdè i duradero pa biba, traha i rekreá.
Royal Haskoning ta formulá un strategia di desaroyo pa esaki. Kondishonnan krusial ta: un gobièrnu stabil i konfiabel, hende bon formá i un kambio den étika laboral. Ya algun invershonista a anunsiá ku nan ta dispuesto pa invertí kontal ku por garantisá trankilidat polítiko, seguridat i stabilidat.
Riba potrèt di robes pa drechi: notario Henri Burgers di ofisina di notario Burgers & Fung A Loi, Prof. Dr. Dinteren di Royal Haskoning, Andrés Casimiri, presidente di GreenTown Curaçao i drs. Paul Jansen di Royal Haskoning despues ku nan a deliberá riba un akuerdo di intenshon kaminda a stipulá ku Royal Haskoning ta hasi e investigashon di faktibilidat pa GreenTown Curaçao i ta partisipá den formulashon di e plan maestro, guia i kordinashon di preparashon i ehekushon di e Proyekto

Back